ଗନ୍ଧରେଲ୍‌ ଡେମ୍‌ ହେବା ପର୍ଯ୍ୟଟନ ସ୍ଥଳୀ

ବଲାଙ୍ଗୀରନେ ବହୁତ୍‌ ସୁନ୍ଦର ସୁନ୍ଦର ପର୍ଯ୍ୟଟନ ଜାଗାମାନେ ରହିଥିବାର୍‌ ବେଲେ ସେନର୍‌ ଗନ୍ଧରେଲ୍‌ ଡେମ୍‌କେ ପର୍ଯ୍ୟଟନ ସ୍ଥଳୀ ରୂପେ ତିଆରି କରାଯିବା । ବଲାଙ୍ଗୀର୍‌ ର ସଦେଇପାଲି ପଂଚାୟତ୍‌ ଗନ୍ଧରେଲ୍‌ ଡେମ୍‌କେ ନୂଆ ପର୍ଯ୍ୟଟନ ସ୍ଥଳୀ କରବାର୍‌ ଲାଗି ସେନର୍‌ ବିଧାୟକ୍‌ ନରସିଂହ ମିଶ୍ର ସେ ଅଂଚଲ କେ ପରିଦର୍ଶନ କରିଥିଲେ । ସେ ଅଂଚଲ ର ଗନ୍ଧରେଲ ଗାଁ ପାସେ ରହିଥିବାର୍‌ ଗନ୍ଧରେଲ୍‌ ମାଟି ବନ୍ଧର୍‌ ଦୁହି ଆଡେ ବହୁତ୍‌ ସୁନ୍ଦର୍‌ ପାହାଡ ମାନକଁର୍‌ ସାଙ୍ଗେ ନଦୀ ରହିଛେ ।

 ସେନ୍‌କେ ସବୁ ବଛର୍‌ ବହୁତ୍‌ ଲୋକ୍‌ ପିକ୍‌ନିିକ୍‌ ଆର୍‌ ବୁଲବାର୍‌ ଲାଗି ଆସିଥିସନ । ସେନ ବହୁତ୍‌ ଭଲ ପ୍ରାକୃତିକ୍‌ ପରିବେଷ୍‌ ସାଙ୍ଗେ ପାଏନ ରହିଥିବାର୍‌ନୁ ସେନ ଅଧିକ ପାଏନ ସଂରକ୍ଷଣ ଲାଗି ସୁବିଧା କରାଯିବା । ପର୍ଯ୍ୟଟନ ସ୍ଥଲୀ ଲାଗି ସେ ଜାଗା ରେ ସବୁ ସୁବିଧା କରାଯିବାର୍‌ ସାଙ୍ଗେ ପାର୍କ ଭିଲ ତିଆରି କରାଯିବା ବଲି ପ୍ଲାନିଂ ଚାଲିଛେ । ପର୍ଯ୍ୟଟନ ସ୍ଥଳୀ ହେବାର୍‌ନୁ ସେନର୍‌ ଆଖର୍‌ ପାଖର୍‌ ବହୁତ୍‌ ଲୁକେ ରୋଜଗାର୍‌କ୍ଷମ ହେଇପାର୍‌ବେ ବଲି ଶ୍ରୀ ମିଶ୍ର କହିଥିଲେ । ସେନକେ ବୁଲି ଆସୁଥିବାର୍‌ ଲୁକକଁର୍‌ ଲାଗି ଶୌଚାଲୟ , ଗାଧବାର୍‌ ସୁବିଧା ଭିଲ୍‌ କରାଯିବା । ପର୍ଯ୍ୟଟନ ସ୍ଥଳୀ କେ ଯିବାର୍‌ ଲାଗି ରାସ୍ତା କାମ୍‌ ବି କରାଯିବା ।