ବ୍ରିଟେନ୍ନୁ ଫିରିଥିବାର ଯାତ୍ରୀ ବଢାଲେ ଚିନ୍ତା
କରୋନାର ନୂଆଁ ଷ୍ଟ୍ରେନ୍ ନେଇକରି ବଢଲା ଚିନ୍ତା, ୧୪ ଦିନେ ୧୨ଟା ଜିଲ୍ଲାକେ ୬୧ ଜନ୍ ଆସିଛନ୍ ବ୍ରିଟେନ୍ନୁ
କରୋନା ଲାଗି ଇହାଦେ ତକ୍ କେନସି ଭ୍ୟାକ୍ସିନ୍ ନାଇଁ ବାହାରି ଥିବାର ବେଲକେ ଇହାଦେ ଇତାର ନୂଆଁ ଷ୍ଟ୍ରେନ୍ ନେଇକରି ଫେର୍ ଚିନ୍ତା ବଢିଛେ । ଇ ନୂଆଁ ଷ୍ଟ୍ରେନ୍ ରାଜ୍ୟନେ ଭିଲ୍ ମୁଡଦୁଖାର କାରଣ ବନିଛେ । ଧୀରେ ଧୀରେ କରୋନା ପ୍ରଭାବ ରାଜ୍ୟନେ କମି ଆସୁଥିବାର ବେଲକେ ଇହାଦେ ଚିନ୍ତା ବଢେଇଛେ କରୋନାର ନୂଆଁ ଷ୍ଟ୍ରେନ୍ । ବ୍ରିଟେନ୍ ସାଙ୍ଗେ ଦୁଶରା କିଛିଟା ଦେଶ୍ନେ ଇ ଭୂତାଣୁ ଦେଖବାକେ ମିଲିଥିବାର ବେଲକେ ଇହାଦେ ବ୍ରିଟେନ୍ନୁ ଫିରିଥିବାର କିଛି ଯାତ୍ରୀକଁର ଭିତରେ ଇ ନୂଆଁ ଷ୍ଟ୍ରେନ୍ର ଲକ୍ଷଣ ଥିବାର ନେଇକରି ସନ୍ଦେହ କରାଯାଉଛେ ।
ରାଜ୍ୟର ୧୨ଟା ଜିଲ୍ଲାକେ ଗଲା ୧୪ ଦିନ୍ ଭିତରେ ୬୧ ଜନ୍ ବ୍ରିଟେନ୍ନୁ ଆସିଛନ୍ । ଭାରତ ସରକାରକଁର ବିପର୍ଯ୍ୟୟ ପରିଚାଲନା କର୍ତ୍ତୃପକ୍ଷକଁର ଆଡୁ ଇଟା ନେଇକରି ସୂଚନା ଦିଆଯାଇଛେ । ଯାର ଉତାରୁ ରାଜ୍ୟ ସରକାରକଁର ଚିନ୍ତା ବଢେଇଛେ । ସେଆଡେ ଯେନ୍ମାନେ ବ୍ରିଟେନ୍ନୁ ଫିରିଛନ୍ ସେମାନକୁଁ ବାହାରକରିକିନା ରକ୍ତ ନମୁନା ପରୀକ୍ଷା କରିକେ ଦିଆଯିବା । ଯେନମାନେ ଇମାନକଁର ସାଙ୍ଗେ ଇ ଭିତରେ ମିଶିଥିବେ ସେମାନକୁଁ ସଙ୍ଗରୋଧ୍ନେ ରଖାଯିବା । ଇଟା ନେଇକରି ସ୍ୱାସ୍ଥ୍ୟ ବିଭାଗ ଅତିରିକ୍ତ ମୁଖ୍ୟଶାସନ ସଚିବ ପ୍ରଦୀପ୍ତ କୁମାର ମହାପାତ୍ର ଏନଏଚଏମ ନିର୍ଦ୍ଦେଶିକାକଁର ସାଙ୍ଗେ ସବୁ ମହାନଗର ନିଗମ କମିଶନର, ଜିଲ୍ଲାପାଲ ଆର ସବୁ ମେଡିକାଲ କଲେଜ ହସ୍ପିଟାଲ ମୁଖ୍ୟ ନିର୍ଦ୍ଦେଶ ଦେଇଛନ୍ । ବ୍ରିଟେନ୍ନେ ଦେଖାଦେଇଥିବାର କରୋନାର ଇ ନୂଆଁ ଷ୍ଟ୍ରେନ୍ ୭୦ ଗୁଣ ଅଏତକା ସଂକ୍ରମଣ ହେବାର ଡର୍ ରହିଛେ । 
ସବୁ ସମସ୍ୟାକେ ଆଖି ଆଗାଡେ ରଖିକରି ରାଜ୍ୟର ସବୁ ବିମାନ ବନ୍ଦର ମାନକେ ଇତାର ଉପରେ ଗୁରୁତ୍ୱ ଦେବାକେ କୁହାଯାଇଛେ । ଯେନ୍ତା ବିଦେଶନୁ ଆସୁଥିବାର କେନସି ଯାତ୍ରୀ ଆସିକରି ଇଠାନେ ବେମାର ନାଇଁ ବଢାବେ ତାର ଉପରେ ନଜର ରଖବା ଲାଗି କୁହାଯାଇଛେ । ସେଆଡେ ବ୍ରିଟେନ୍ନୁ ଫିରିଥିବାର ୬୧ ଜନ୍କଁର ରକ୍ତ ନମୁନା ଆରଟିପିସିଆର କରାବାକେ ହେବା । ଇଥିର ଲାଗି ଭୁବନେଶ୍ୱରନେ ଥିବାର ଡିବିଟି ଜୀବ ବିଜ୍ଞାନ କେନ୍ଦ୍ର ଲ୍ୟାବ୍କେ ଦାୟିତ୍ୱ ଦିଆଯାଇଛେ । କୋଭିଡ୍ ଗାଇଡ୍ ଲାଇନ୍ ହିସାବେ ବାହାରୁ ଆସୁଥିବାର ସବୁ ଲୁକକୁଁ ଇହାଦେ ସଙ୍ଗରୋଧ୍ନେ ରଖାଯିବା ।
ଇ ସମସ୍ତକଁର ପାଶୁ ୩ ଏମ୍ଏଲ୍ର ୨ ପ୍ରକାରର ସ୍ୱାବ୍ ସଂଗ୍ରହ ଲାଗି ଆଇସିଏମଆର୍ ଆଡୁ କୁହାଯାଇଛେ । ଆର କାହାର ଭିତରେ ଇ ନୂଆଁ ଷ୍ଟ୍ରେନ୍ର ଲକ୍ଷଣ ରହିଥିଲେ ମାର୍ଗଦର୍ଶିକା ହିସାବେ ପ୍ରତିଷେଧକ୍ ବେବସ୍ଥା ନିଆଯିବା ।
